بذكرك وشلون كنتي تنامين
كنتي وكنتي مقصدي تفهـمينه
دايم ودمعك مالين محجر العين
لحد ما أصبحتي لحالك سجينه
محطمه مكسور فيك الجناحين
بين الهموم وحزن نفسك رهينه
بيدي جعلتك شي وأنتي تعرفين
بيدي صنعك الوقت دره ثمينه
حب(ن)عطيتك فيه منتي تحلميـن
أكبر من اللي كنتي تتخيلينه
قلب(ن)وهبتك فيه قمتـي تباهيـن
وسط العذارى والحزن تقهرينه
واليوم تهديني بقلبي سكاكين
جزاي منك خاطري تكسرينه
ماني بقايل أقعدي لاتروحين
روحي عسى باقي حياتك حزينه
منتي حسوفه أبعدي لاتردين
والحب أبنسى ما مضى من سنينه
دام الخيانة فيك وسط الشرايين
ماتلزميني والوفاء تجهلينه
وش عاد لو كنتي على القرب تبكين
قلب(ن) قسى يابنت ماتحركينه
قررت أبرحل وأتركك لو تنادين
عزيز نفس ولا رضيت الغبينه